علاش الإعلان متاعك ما يجيبش نتيجة؟ 10 أخطاء
آخر تحديث · قراءة 8 دقايق
صرفت على سبونسور وما جاك حتى ميساج؟ ما تقلقش، صارت لبرشا ناس. أغلب الوقت السبب موش «فيسبوك يسرق» ولا «التونسي ما يشريش أونلاين»، السبب غلطة ولا زوز تنجم تتصلّح. جمعنالك أكثر 10 أخطاء نشوفوهم، وكيفاش تتفادى كل وحدة.
1. الهدف الغالط
أكثر غلطة تتعاود: تحب مبيعات وتختار «تفاعل» ولا «ناس يشوفوك». فيسبوك يجيبلك اللي طلبتو: لايكات ومشاهدات. كان تبيع بالميساج، الهدف هو «ميساجات من الحرفاء». التفاصيل في دليل اختيار الهدف.
2. تصويرة ما توقّفش الصبع
الناس يسكرولّيو بالزربة. تصويرة مظلمة، مضبّبة، ولا مليانة كتيبة ما توقّفش حتى حدّ. صوّر المنتوج في ضوء النهار، بخلفية نظيفة، وخلّي المنتوج هو البطل. للستوري والريلز، صوّر عمودي.
3. نص طويل وما فيهوش العرض
الحريف لازم يفهم في ثانيتين: شنوّة تبيع، علاش هو باهي، وكيفاش يطلب. حطّ المهم في السطر الأوّل. اكتب بالدارجة كان جمهورك تونسي. وما تنساش: كلمات كيما «ضمان 100%» ولا «اربح فلوس» ولا وعود صحّية تنجم تخلّي Meta ترفض الإعلان. المساعد في Sponsi ينبّهك كان فمّا كلمة ممنوعة.
4. جمهور ضيّق برشا (ولا عريض برشا)
كان اخترت مدينة وحدة، عمر بين 25 و27، واهتمام وحيد، الجمهور يولّي صغير والسوم يطلع. والعكس: كان تبيع في سوسة برك وإعلانك يبان في بنزرت، صرفت على ناس ما تنجمش توصّلهم. اختار الولايات اللي توصّل ليها بالحق، وخلّي العمر والاهتمامات واسعين شويّة في الأوّل.
5. ميزانية صغيرة مقسومة على برشا إعلانات
فيسبوك يلزمو شويّة نتايج باش «يتعلّم» شكون يحب إعلانك. كان قسمت ميزانية صغيرة على 4 إعلانات، كل واحد ياخو فتات وما يتعلّم حتى واحد. ابدا بإعلان ولا زوز، وزيد على اللي يخدم.
6. تحكم على الإعلان بالزربة
تنشر الصباح، وفي العشية تقول «ما خدمش» وتوقّف. أوّل نهار ولا نهارين هوما وقت تعلّم. خلّي الإعلان ياخو وقتو، إلّا كان يحرق الفلوس بلا حتى نتيجة: هاكا الحالة اللي Auto-Stop يوقّف فيها الحملة وحدو، كي تصرف 35% من الميزانية بلا نتيجة.
7. ما تجاوبش على الميساجات
إعلان الميساجات يخدم، والحريف يبعث «السوم؟»، وإنتي تجاوب بعد 6 سوايع. خلاص، مشى لغيرك. حضّر رد سريع فيه السوم والتوصيل، وجاوب في أقرب وقت، خاصة في الساعات الأولى متاع الحملة.
8. «السوم في البريفي» وبس
برشا حرفاء يتعبو من «السوم في البريفي» ويسكرولّيو. كان السوم متاعك معقول، اكتبو ولا على الأقل «من … د». هذا ينقص الميساجات اللي ما تجيبش بيع، ويخلّي اللي يبعثو أقرب للشراء.
9. صفحة فارغة ولا ما توحيش بالثقة
الحريف يشوف الإعلان، يدخل للصفحة: ما فمّا كان 3 بوستات من عامين، بلا كومنتارات، بلا عنوان. يخاف ويخرج. قبل ما تصرف، نظّم الصفحة: تصاور حقيقية، أسعار، طريقة التوصيل، وآراء حرفاء حقيقيين كان عندك.
10. ما تقراش الأرقام
«ما خدمش» موش رقم. اسأل روحك: قدّاش من واحد شاف الإعلان؟ قدّاش ضغط؟ قدّاش بعث ميساج؟ قدّاش شرى؟ كان الناس يشوفو وما يضغطوش، المشكل في التصويرة ولا العرض. كان يبعثو وما يشريوش، المشكل في الجواب ولا السوم. في آخر كل حملة في Sponsi يوصلك تقرير بالدارجة يوريك الأرقام هاذي وشنوّة تعمل من بعد.
كيفاش تعاود تجرّب بعد إعلان ما خدمش
إعلان ما خدمش موش خسارة كاملة: هو معلومة. قبل ما تعاود، بدّل حاجة وحدة برك، باش تعرف شنوّة اللي فرق:
- كان الناس ما يضغطوش جملة: بدّل التصويرة ولا الفيديو أوّلاً.
- كان يضغطو وما يبعثوش: بدّل النص والعرض (السوم، التوصيل، الهدية).
- كان يبعثو وما يشريوش: راجع طريقة الجواب والسوم، موش الإعلان.
- كان الإعلان ما بانش لبرشا ناس: وسّع الجمهور شويّة (ولايات أكثر، عمر أوسع).
كي Auto-Stop يوقّف حملة، تنجم تختار «عاود جرّب بإعلان آخر» مباشرة: نفس الحملة، إعلان جديد، والباقي متاع الميزانية ما يضيعش. وكان قرّرت تسكّرها، اللي ما تصرفش يرجع لرصيدك.
قائمة قبل ما تنشر
- الهدف يطابق شنوّة تحب (بيع بالميساج = ميساجات).
- تصويرة واضحة، عمودية للستوري.
- نص قصير فيه العرض وكيفاش يطلبو.
- الولايات اللي توصّلهم برك.
- ميزانية مركّزة على إعلان ولا زوز.
- شكون يجاوب على الميساجات، وبالزربة.
تحب تبدا من الأوّل؟ الدليل خطوة بخطوة. تحب تفهم قدّاش تصرف؟ دليل الأسعار.