سبونسور فيسبوك في تونس: ميساجات، بوستات وجمهور حسب الولاية
آخر تحديث · قراءة 5 دقايق
فيسبوك يقعد أوّل بلاصة يلوّج فيها التونسي على محل، خدمة ولا منتوج. أما بوست عادي ما يوصلش كان لجزء صغير من المتابعين متاعك. السبونسور يخلّيك تختار شكون يشوفك وشنوّة تحب منو: ميساج، تفاعل، ولا يعرف اسمك. الصفحة هاذي توريك شنوّة تنجم تعمل في فيسبوك مع Sponsi، وكيفاش تختار الحملة اللي تناسب نشاطك.
حملة ميساجات: الحريف يبعثلك مباشرة
في تونس، أغلب البيع في فيسبوك يتعمل بالميساجات: «قدّاش؟»، «فمّا توصيل لصفاقس؟»، «فمّا مقاس 40؟». حملة ميساجات من الحرفاء تطلب من فيسبوك يوري إعلانك للناس اللي عندهم عادة يبعثو ميساج للصفحات، موش للّي يعملو لايك ويفوتو.
الإعلان يبان باسم صفحتك، وكي الحريف يضغط، تتحلّ محادثة ماسنجر معاك إنتي مباشرة (ولا إنستغرام Direct كان اخترت إنستغرام). كان البوست اللي اخترتو ما فيهوش زرّ ميساج، نزيدوهولو في الإعلان: ما عندك حتى شي تعملو.
نصيحة وحدة: حضّر روحك للأسئلة. ميساج ما تجاوبش عليه في الساعة، حريف يمشي لغيرك.
سبونسوري بوست موجود
عندك بوست خدم مليح وحدو (تصويرة منتوج، فيديو، عرض)؟ تنجم تسبونسوريه كيف ما هو. الميزة: اللايكات والكومنتارات اللي فيه يقعدو، وهذا يعطي ثقة للّي يشوفو أوّل مرّة. تختار البوست من قائمة البوستات متاع صفحتك، وتختار الهدف: ميساجات، تفاعل، مشاهدات فيديو، ولا برشا ناس يشوفوك.
كيفاش تختار البوست؟ خوذ اللي جاب أكثر تفاعل طبيعي في الأسابيع اللي فاتت، واللي فيه العرض واضح (المنتوج، السوم ولا «ابعثلنا»). بوست فيه برشا نص وتصويرة مضبّبة ما يتصلّحش بالفلوس.
إعلان جديد بتصويرة ولا فيديو
ما عندكش بوست مناسب؟ تعمل إعلان جديد: تحمّل تصويرة ولا فيديو، وتكتب نص قصير. المساعد ينجم يقترحلك نصوص بالدارجة ولا بالفرنسي، ويحذّرك من الكلمات اللي Meta ترفضها (وعود صحية، «ربح مضمون»…). قبل ما تنشر، تشوف المعاينة في الفيد وفي الستوري.
شنوّة يخدم في إعلان فيسبوك في تونس؟ تصويرة حقيقية للمنتوج (موش تصويرة من الإنترنت)، السوم ولا العرض واضح، والمنطقة اللي توصّلها. الناس تثق أكثر في تصويرة متاعك بالتليفون من تصويرة «احترافية» يلقاوها في كل بلاصة. والنص القصير بالدارجة يقرّب الإعلان للحريف: جملة تقول شنوّة تبيع، جملة تقول علاش إنتي، وجملة تقلّو شنوّة يعمل (ابعثلنا، تعدّى للمحل).
الجمهور: الولايات الـ24، العمر والجنس
إنتي تختار الولايات اللي تخدم فيها، من الـ24 ولاية. ما فمّاش علاش تخلّص على ناس في بنزرت كان ما توصّلش لبنزرت. أمثلة:
- محل في سوسة: سوسة، المنستير والمهدية، باش تغطّي الناس اللي ينجمو يجيو بالحق.
- بيع أونلاين مع توصيل للولايات الكل: خلّي تونس الكل، وفيسبوك يلقى وحدو وين الناس المهتمّين.
- خدمة في تونس الكبرى: تونس، أريانة، بن عروس ومنوبة.
تزيد العمر، والجنس كان منتوجك لجمهور معيّن. نصيحة: ما تضيّقش برشا في الأوّل. جمهور صغير برشا يغلّي السوم، وفيسبوك يحتاج شويّة مساحة باش يلقى الناس الصحاح.
متابعين جدد للصفحة
كان صفحتك جديدة وتحب تكبّر قاعدة المتابعين قبل ما تبدا تبيع، فمّا هدف متابعين جدد للصفحة. أما ردّ بالك: المتابع موش حريف. كان الهدف متاعك البيع، الميساجات أحسن من الأوّل.
شنوّة يلزمك باش تبدا
- صفحة فيسبوك، وإنتي admin فيها.
- رصيد بالدينار (أقل شحن حالياً 22,5 د).
- ميزانية في النهار من 4,5 د، لمدّة من نهار لين 30 نهار.
الخطوات الكل بالتفصيل (ربط الصفحة بلا كلمة السر، الشحن، المعاينة) في دليل السبونسور في فيسبوك خطوة بخطوة. وكان حملة سابقة ما جابتش، اقرا الأخطاء اللي تتعاود قبل ما تعاود.