فيديو إعلان لمنتوجك من تصاورك، جاهز للريلز والسبونسور
آخر تحديث · قراءة 5 دقايق
الإعلان اللي فيه فيديو يشدّ العين أكثر في فيسبوك وإنستغرام، أما مونتاج عند وكالة ياخو وقت وفلوس، وبرشا تجّار في تونس يقعدو يسبونسوريو بتصويرة وحدة. في Sponsi تحطّ تصاور منتوجك (ولا فيديوهات صغار من تليفونك) واللوغو، تكتب على منتوجك بكلامك، والذكاء الاصطناعي يكتب سيناريو ويركّب فيديو إعلان عمودي بكتيبة بالدارجة وموسيقى. بالفرنسي يقولولها «vidéo publicitaire» ولا «vidéo pub»: هنا تعملها من تليفونك، بلا كاميرا وبلا مونتور.
أمثلة للتوضيح (الماركات والمنتوجات موش حرفاء حقيقيين). النتيجة تختلف من منتوج لآخر.
شنوّة تاخو بالضبط؟
- فيديو عمودي (9:16) جاهز للريلز والستوري، يخدم زادة في الفيد وفي تيك توك.
- سيناريو يكتبو الذكاء الاصطناعي من الوصف متاعك: شنوّة المنتوج، شنوّة يميّزو، السوم ولا العرض، وكيفاش الحريف يطلب.
- تصاورك وفيديوهاتك في الوسط، ونكمّلو كان يلزم بلقطات مرخّصة تمشي مع منتوجك.
- كتيبة بالدارجة على الفيديو، خاطر برشا ناس يتفرّجو بلا صوت.
- موسيقى مرخّصة، وتنجم تزيد صوتك إنتي.
الفيديو يقعد ملكك: تنزّلو، تنشرو في صفحتك، في تيك توك ولا في ستاتو الواتساب، ولا تستعملو مباشرة في حملة سبونسور. وكان تحب تبدّل حاجة، تنجم تطلب تعديل.
كيفاش يخدم: 3 خطوات
- حطّ التصاور، الفيديوهات واللوغو من تليفونك. تصويرة وحدة تكفي باش تبدا، أما كل ما تزيد زوايا وتفاصيل، الفيديو يجي أغنى.
- اكتب على منتوجك: الاسم ووصف بكلامك العادي: شنوّة هو، لشكون، السوم ولا العرض، التوصيل والخلاص. منّو يتكتب السيناريو والكتيبة.
- يوصلك الفيديو جاهز: يتصنع وحدو ويوصلك إشعار كي يحضر. تتفرّج فيه، تنزّلو، ولا تطلب تعديل.
الخلاص من رصيدك بالدينار، نفس الرصيد اللي تشحنو بـD17، البوستة، البنك ولا كاش. السوم يبانلك في حسابك قبل ما تأكّد الطلب، وكان الفيديو ما تصنعش، الفلوس ترجع لرصيدك وحدها.
كيفاش تصوّر منتوجك بالتليفون
ما يلزمكش معدّات غالية. شويّة نصايح بسيطة يفرقو برشا في النتيجة:
- صوّر في الضوء الطبيعي، قدّام الشبّاك، موش تحت لمبة صفراء.
- خلفيّة بسيطة: حيط أبيض ولا طابلة نقيّة. المنتوج هو البطل.
- التليفون عمودي وقريب من المنتوج: ما تزوّمش، قرّب بيدّك.
- صوّر من 3 جهات: قدّام، جنب، وتفصيلة قريبة.
- للفيديو: 10 ثواني تكفي، يدّك ثابتة، وبلا موسيقى (نزيدوها احنا).
وكان عندك تصاور قدم في صفحتك ولا في الإنستغرام، تنجم تستعملهم زادة، المهم يكونو واضحين وموش مقصوصين.
الصوت: موسيقى برك، صوتك، ولا صوت ستوديو
- موسيقى برك: الفيديو يحكي بالكتيبة والتصاور. هذا الأسرع.
- صوتك إنتي: تسجّل من تليفونك ولا تحمّل ملف، ونحطّو الموسيقى تحت صوتك. الكتيبة تتكتب من كلامك.
- صوت ستوديو: فريقنا يكتب السكريبت ويسجّل صوت يحكي على منتوجك. اختيار بفلوس زايدة يبانلك قبل ما تخلّص، والفيديو يحضر في حدود 24 ساعة.
ما نستعملوش أصوات «روبو» مصنوعة: يا صوت حقيقي يا موسيقى. الصوت التونسي الحقيقي يقرّب الحريف أكثر من صوت آلي ما يشبهلوش.
من الفيديو للسبونسور في ضغطة
الفيديو معمول باش يتسبونسورى. من نفس الحساب، تختار «استعمل في حملة» والفيديو يتحطّ وحدو في إعلان جديد: تختار الهدف (ميساجات، مشاهدات الريلز، ولا برشا ناس يشوفوك)، الولايات والعمر، والميزانية في النهار من 4,5 د، وتشوف المعاينة في فيسبوك وإنستغرام قبل ما تنشر. Auto-Stop يراقب الإعلان كيما أي حملة أخرى، ويوقّفو كان صرف وما جاب شي.
كان مازلت ما عملتش سبونسور قبل، ابدا بـالدليل خطوة بخطوة، وشوف الأخطاء اللي تحرق الميزانية قبل ما تطلق. وكان جمهورك في إنستغرام، دليل إنستغرام يفسّرلك الريلز والستوري.
لشكون ينفع فيديو الإعلان؟
لكل نشاط يتباع بالعين: الحلويات والأكل، الملابس والصبابط، التجميل والعطور، الديكور والأثاث، الإلكترونيك، ألعاب الصغار، وحتى الخدمات (تنظيف، دروس دعم، صيانة) كي توري خدمتك قبل وبعد. أمثلة: حانوت حلويات في صفاقس يحضّر لطلبيات العيد، بوتيك ملابس في سوسة يوري الكولكسيون الجديدة في ريلز، ولا خدمة تنظيف زرابي توري الفرق قبل وبعد.
الفيديو موش سحر: كان العرض ما يهمّش الحريف ولا السوم موش واضح، حتى أحسن مونتاج ما يبيعش. أما فيديو واضح، فيه المنتوج من أوّل ثانية والعرض مكتوب، يعطي إعلانك فرصة أكبر باش يجيب ميساجات.