فيسبوك رفض الكارطة متاعك؟ علاش يصير في تونس وشنوّة الحل
آخر تحديث · قراءة 6 دقايق
«Votre carte a été refusée»، «Paiement échoué»، ولا حتى «Compte publicitaire désactivé»: هاذي من أكثر الحاجات اللي تقلّق اللي يحب يعمل سبونسور في تونس. تحضّر الإعلان، تختار الجمهور، وفي الآخر فيسبوك ما يقبلش الكارطة. في الدليل هذا نفسّرولك علاش يصير هذا، شنوّة تنجم تثبّت مع البنك متاعك، وكيفاش تسبونسوري صفحتك بالدينار حتى كان الكارطة ما تتعدّاش. (بالدارجة يقولو: «kifech nkhalles sponsoring ki el carte ma t3addech?»: هاو الجواب.)
علاش فيسبوك يرفض الكارطة؟
Meta تفوتر الإعلانات من برّا وبالعملة الصعبة. معناها كل خلاص هو خلاص دولي على الإنترنت. الكارطة متاعك لازم تكون مسموحلها بالخلاص هذا، وفيها رصيد وسقف يكفيو، وتعدّي التثبّت (الكود اللي يجيك في SMS). كان وحدة من الشروط هاذي ناقصة، الخلاص يترفض، وفيسبوك ما يقلّكش ديما السبب الحقيقي.
الأسباب اللي تتعاود برشا في تونس:
- الكارطة محلية برك: برشا كارطات بنكية عادية تخدم في تونس وما تخلّصش برّا على الإنترنت.
- الخلاص على الإنترنت موش مفعّل: ساعات يلزم تفعّلو من البنك ولا من التطبيق متاعو قبل أوّل خلاص.
- السقف وفى ولا الرصيد ما يكفيش: الكارطات اللي تخلّص بالعملة الصعبة عندها سقف، والمبلغ بالدينار يتحسب مع مصاريف الصرف والبنك.
- الكود متاع التثبّت ما وصلش ولا وصل بعد ما وفى الوقت.
- Meta ما قبلتش نوع الكارطة: بعض الكارطات المسبّقة الدفع (prépayées) تترفض من نظام الخلاص متاع Meta حتى كان فيها فلوس.
e-dinar، الكارطة التكنولوجية، والكارطة العادية
كارطة e-dinar متاع البوستة: فمّا أنواع، وموش الكل تخلّص برّا. حتى اللي تخلّص، تنجم تترفض كان الرصيد بالضبط ما يغطّيش المبلغ مع المصاريف، ولا كان نوعها ما يتقبلش عند Meta.
الكارطة التكنولوجية (اللي يعطيها البنك للخلاص بالعملة الصعبة في حدود سقف سنوي): هي الأقرب باش تخدم مع فيسبوك، أما الشروط والسقف يتبدّلو من بنك لبنك. كان السقف السنوي وفى، الخلاص يترفض حتى لآخر العام.
الكارطة البنكية العادية: في أغلب الحالات ما تخلّصش برّا على الإنترنت، كان ما البنك ما فعّلهاش لهالشي.
الشروط هاذي تتبدّل حسب البنك ونوع الكارطة والوقت: الأحسن تسأل البنك ولا البوستة متاعك مباشرة قبل ما تعاود تجرّب.
شنوّة تثبّت قبل ما تعاود تجرّب
- اسأل البنك: الكارطة تخلّص على الإنترنت برّا تونس؟ وكان لا، ينجمو يفعّلوها؟
- ثبّت في الرصيد والسقف، وخلّي هامش للمصاريف وفرق الصرف.
- ثبّت إنو نمرة التليفون متاعك محيّنة عند البنك باش يوصلك كود التثبّت.
- اكتب الاسم ومعطيات الكارطة كيف ما هي بالضبط، وثبّت في البلاد والعنوان في إعدادات الخلاص متاع فيسبوك.
- ما تعاودش تجرّب برشا مرّات ورا بعضهم: الرفض المتكرّر ينجم يخلّي Meta تحدّ ولا تسكّر الحساب الإعلاني.
كان الحساب الإعلاني تسكّر بعد خلاص ما تعدّاش
كي يفشل الخلاص، Meta ساعات توقّف الإعلانات وتطلب تخلّص المبلغ اللي فات قبل ما تخلّيك تعاود. وكي يتعاود الرفض، ينجم الحساب الإعلاني يتسكّر. في الحالة هاذي: خلّص الدين من «Facturation et paiements» في Meta كان تنجم، ولا اطلب مراجعة من نفس البلاصة. صفحتك ما تتمسّش: الحساب الإعلاني حاجة، والصفحة حاجة أخرى.
وحتى كان الحساب الإعلاني متاعك مسكّر، تنجم تكمّل تسبونسوري صفحتك عبر منصّة تطلق الإعلانات من حساب إعلانات متاعها، كيما نفسّرو لوطة.
الحلول «الجانبية» وخطرها
كي الكارطة ما تتعدّاش، برشا ناس يلتجئو لحلول سريعة:
- «واحد يعرف واحد» يسبونسوري بكارطتو: بلا وصل، بلا أرقام، وسعر الصرف ما تعرفوش. وكان طلب منك كلمة السر ولا الكود اللي يجيك في SMS، راهو خطر على صفحتك: عمرك ما تعطيهم لحدّ.
- كروت إهداء ولا كودات شحن فيسبوك تشريها بالدينار: تنجم تخدم، أما تقعد وحدك قدّام Ads Manager، وسعر الصرف فيها ساعات غالي برشا.
- وكالة تاخو pack: مريح، أما ساعات ما تعرفش قدّاش من فلوسك مشات بالحق للإعلان، وبرشا يطلبو يكونو admin في صفحتك.
الحل بلا كارطة: تخلّص بالدينار وتطلق إعلانك وحدك
في Sponsi ما تحطّ حتى كارطة. تشحن رصيدك بالدينار بـD17، حوالة بريدية، تحويل بنكي ولا كاش، تبعث تصويرة الوصل، والرصيد يتزاد عادةً في ساعة من وقت الخدمة. المنصّة هي اللي تطلق الإعلان من حساب الإعلانات متاعها عبر الواجهة الرسمية متاع Meta، وهي اللي تخلّص Meta. الإعلان يبان باسم صفحتك، والحرفاء يبعثولك إنتي مباشرة.
صفحتك تقعد ملكك: تعطينا صلاحية «الإعلانات» و«الإحصائيات» برك من «الوصول إلى المهام»، بلا كلمة سر وبلا admin، وتنحّيها وقتاش ما تحب. أقل شحن حالياً 22,5 د، والحملة تبدا من 4,5 د في النهار.
الخطوات بالتفصيل في دليل الخلاص بلا كارطة، ومن بعد تبّع الدليل خطوة بخطوة باش تطلق أوّل سبونسور، ولا شوف السبونسور في تونس بالدينار.